top of page

【不絕望的絕望主保】

你知道唔知道教會邊位聖人係絕望主保?你又知道唔知道邊位聖人個額頭有個傷口又流膿又惡臭?

.

絕望主保,香港人較為熟悉嘅係聖猶達,不過今日教會紀念嘅係另一位絕望主保-聖麗達。睇睇佢個稱呼先,網上有對聖人唔同嘅稱謂:有聖女麗達,有聖婦麗達,亦有叫麗達修女。剛剛好,三個稱謂剛好表達咗聖人三個階段:做女兒嘅階段,做妻子嘅階段同做修女嘅階段,聖人喺三個階段都修德立功成聖。

.

話說聖人有次聽咗茨冠聖傷嘅道理之後,個頭開始非常痛,唔係平時頭痛嗰隻痛,而係好似有一根荊棘刺入佢個額頭度咁,之後仲腫起嚟,同埋流膿兼夾傳出臭味,所以你見聖人嘅畫像通常喺佢額頭都會有一根荊棘,而呢一個傷口除咗聖人去羅馬朝聖嗰時有短暫好返過之外,一直陪伴聖人直至去世。順道一提,聖人嘅遺體而家都未腐化,存放喺意大利Cascia嘅聖麗達大殿。

.

聖人由做女時想獻身修道不過被父母安排嫁人,到做妻子時遭受家暴、丈夫同兩個兒子相繼死亡,到申請咗三次先破例入到修完,嗰份鍥而不捨嘅信望愛精神,正正就係我哋遭遇絕境同埋困難時嘅好榜樣,呢個就係點解佢被奉為「絕望和不可能事件主保」。希望我哋都學到聖麗達嘅榜樣,喺絕望嘅環境都能夠堅持,千祈唔好失去希望。



116 次查看

Comments


bottom of page