好景不常，我哋又要嚟到呢度同大家渡過主日。 疫情雖然嚴重，但係今日嘅進堂詠話畀我哋知，上主就係我哋嘅信心。既然有上主做我哋嘅信心，我哋理應係無敵嘅，願我哋本住呢份信心，由自己做起，喺抗疫途上大家都各自盡好本份。
今日福音講莠子和麥子嘅比喻，耶穌佢自己都同大家解釋咗呢個比喻，莠子同麥子係兩種好似嘅植物，初頭生出嚟嘅時候好難分別，要等到吐穗嘅時候先分別到。聖經用呢個比喻帶出上主係公義嘅，呢個世界善惡到頭終有報，不論善人定係惡人最終都會得到上主嘅審判。 之但係咁，unlike莠子和麥子，人類係有機會改過變返好嚟，所以我哋要祈禱，願惡人們都能夠改過遷善。
以下係香港唔同嘅堂區舉行直播彌撒嘅時間，喺呢一段冇得親身去望彌撒嘅日子，希望我哋都靠住望網上直播彌撒得到神益，得到力量，做好自己，為大家同埋社會健康負責任。
聖母無原罪主教座堂：https://youtu.be/1NaOTDXKyCY
聖依納爵小堂：https://youtu.be/7oqD7cYqQIs
我哋今日慶祝加爾默羅聖母瞻禮，我哋特別向香港加爾默羅赤足隱修院、聖母聖衣堂、澳門嘉模聖母堂同埋所有配戴聖母聖衣嘅教友致候，並願上主時常都與你們同在。
好，今日有好多資訊要講，我哋事不宜遲嗱嗱聲開始！Basic嘢先：加爾默羅／嘉模／加爾默耳／迦密，好多個名但都係同一樣嚟，山嚟嘅，喺巴勒斯坦嗰頭。個山好耐歷史架啦，相傳話向來都有啲敬畏上主嘅人喺嗰度渡修德嘅生活。想當年厄里亞係上面同班拜邪神嘅人等鬥，鬥究竟邊個神會親自降火落嚟燒返佢哋自己個派啲祭品，咁當然雅威係無得輸啦。
背景講完到修會。轉眼間我哋去到12世紀十字軍東征嘅年代。當時十字軍喺回教徒手中奪回聖地，有啲十字軍就想效法厄里亞先知嘅精神，就開始咗祈禱同補贖嘅生活，最早期嘅加爾默羅隱修士就係呢班人。1209年，佢哋嘅頭目St Berthold眼見佢哋嘅團體越嚟越多人，於是就去搵耶路撒冷個宗主教St Albert幫佢哋寫套會規，而到咗1226年，教宗奧諾理三世正式承認此會規，就係咁，加爾默羅會就成立咗啦！
故事嚟到呢度係未完架！頭先講到十字軍東征，當時嘅英國仲係屬於天主教會嘅國家，所以軍中有啲英國人就請咗幾位加爾默羅會嘅修士去英國，仲幫班修士起埋修院添，就喺劍橋附近咋嘛。咁無啦啦做咩事幹要提起係英國呢？就係因為喺英國呢邊孕育咗下一位修會嘅總會長，叫St Simon Stock。就係呢位總會長，佢為修會向聖母求一個特恩，聖母之後就顯現俾佢，仲親授咗樣勁嘢俾呢位總會長――聖母聖衣，仲同佢講咗話佢同所有加爾默羅成員都獲得這個特恩，無論邊個臨死時虔誠地著住聖衣嘅都唔會跌入地獄永火度，邊個臨死時虔誠地著住聖衣嘅都會得救。哇，真係勁。
ok咁聖母聖衣聽就聽得多，加爾默羅聖母聖衣有啲亦都可能已經見過，咁其實佢係點樣樣架呢？望望今日幅圖先，見唔見到聖母手上攞住條繩，兩端分別吊住塊啡色方形嘅嘢？佢就係加爾默羅會嘅聖母聖衣，要提醒嘅係呢個啡色嘅先係屬於加爾默羅聖母聖衣，其他會亦都有其他顏色嘅聖衣。好啦，咁配戴聖母聖衣又乜好處？厲害喇，聖母許諾過3樣嘢：永遠得救的保證、迅速救出煉獄、靈魂肉身在現世危險中，恆常獲得聖母瑪利亞的助祐。齋聽有冇覺得筍先？當然筍啦，本身信天主就經已夠筍，仲要有埋聖母幫手，冇得頂。不過大家跟我一齊讀下面3句說話，好重要嘅：聖衣並唔係保護我嘅神奇符咒、聖衣並唔係得到救恩嘅自動擔保、聖衣並唔寬免人唔遵守基督徒生活嘅要求。
聖衣象徵聖母嘅外衣、聖母嘅盾牌，係聖母同配戴聖衣者緊密結合嘅標記，所以唔好以為是是但但嘅人戴咗聖衣就無敵呀，戴聖衣係件有規有矩嘅事情嚟架。有咩規矩呢就等我係度好簡單咁一一同你娓娓道來。首先係祈禱。聖女大德蘭話祈禱係獲得一切德行嘅第一步。跟住第一次配戴聖衣前要搵個神父幫你祝聖同埋授予聖衣。若果你係想換新聖衣，自己戴新聖衣時就自然祝聖咗架啦。咁戴咗聖衣之後要做咩架？要每日唸聖母小日課！聖衣要求我哋度真正基督徒嘅生活，守福音嘅教導，守好第6同第9誡。做好晒以上先叫可以獲得神恩架。 講到呢度，大家都跟到係咪？辛苦晒！係長咗啲嘅，但都希望大家對加爾默羅聖母同聖母聖衣有多啲了解，同埋戴唔戴聖衣都好，都可以度一個有聖德嘅生活啦。而家輕鬆一下，睇埋下面另一個絕不能錯過嘅部份吖！
同場加映：今日嘅同場加映就勁囉！今日我哋獲得香港赤柱加爾默羅隱修院苦修女在場同意底下入咗禁院影咗幾張相。介紹返，禁院，即係普通平信徒唔入得嘅地方，相中可以見到聖堂同禁院之間有道閘，閘上面有加爾默羅會嘅會徽，平時苦修女們只會喺閘後面嘅禁院範圍望彌撒，今次有機會畀大家親歷一下，唔惹少！
最後，想同大家推介一本書：The Queen's Festivals我真係好喜歡呢本書，基本上佢介紹咗好多聖母嘅節日，不論你聽過好未聽過都好，有興趣嘅不妨撳下面條link，睇下呢本書嘅介紹吖
今日係聖本篤瞻禮日，不如就講下聖本篤聖牌啦！
聖本篤聖牌有兩面，正面係聖本篤手持十字聖架同埋本篤會規。另外仲有毒酒同埋毒麵包，原因係當時聖人曾被人邀請去做一間隱修院嘅院長，點知因為聖人嘅規則太嚴格，搞到班修士唔太鐘意聖人，咁有一次班修士就係聖人杯酒落毒，當聖人係酒杯上畫上十字聖號，杯酒就突然爆開左！而毒麵包就係因為又有一次有人係聖人個麵包度落毒，但就係聖人食之前天主派左一隻烏鴉將麵包擔走！
而正面中間有拉丁文寫住：CRUX SANTI PATRIS BENEDICTI，意思係「聖父本篤的十字架」，而圍住有另一句寫住：EJUS IN ORBITU NOSTRO PRAESENTIA MUNIAMUR，意思係「但願聖人在我們臨終時親自前來加添我們的力量」。 而聖牌嘅背面有唔同嘅拉丁文句子，並以頭一個字母代表，中間C.S.P.B.（Crux Santi Patris Benedicti）意思都係「聖父本篤的十字架」，而中間十字架打直嘅C.S.S.M.L.（Crux Sacra Sit Mihi Lux）意思係「但願十字聖號成為我的光明」，十字架打橫嘅N.D.S.M.D.（Non Draco Sit Mihi Dux）意思係「願毒蛇永不做我的嚮導」。 而最外層圍住由右面開始嘅V.R.S. N.S.M.V. S.M.Q.L. I.V.B.（Vade Retro Satana/ Numquam Suade Mihi Vana/ Sunt Mala Quae Libas/ Ipse venena bibas）意思係「撒殫退去罷！總不要引誘我行虛假之事。你引我所做的都是惡事。你自己喝下這杯毒酒吧！」而最上面嘅PAX意思係「平安」！ 聖本篤聖牌可以幫助我哋更有力量去依靠天主對抗誘惑，讓我哋面對誘惑時，可以善用聖牌咁樣祈禱：「天主，願那些虔誠熱切地善用這聖牌的人，在誘惑之時幸蒙你的助祐；願那些努力行善的人，身心都得到你的祝福，獲得度聖善生活所需的聖寵，求你赦免他們因過犯所受的罪罰。因我們的主基督。亞孟。」 #聖本篤聖牌 #聖本篤 #stbenedict #saintbenedictmedal #stbenedictmedal #catholic #churchsupplies #christusrex #christthekingsupplies #hongkongcatholic #macaucatholic #liturgy
#天主教 #信仰 #禮儀 #聖母 #聖物
