唔知大家有冇聽過「教會聖師」呢個名？就請教會今日紀念一位聖師聖十字若望，我哋認識一下咩係聖師。
就咁聽聖師可能大家唔係好知係咩，睇睇聖師嘅英文先：Doctor of the Church，呢個Doctor唔解做醫生，係博士，學識淵博、知識豐富之士。
咁係咪所有奉教嘅、有學識嘅就稱得上「教會聖師」？原來天主教會二千幾年歷史當中，只有36位聖人被尊為「教會聖師」，一生突出而神聖，喺神學或教義上要有卓越貢獻，包括佢哋嘅著作要有非常出色、佢哋嘅教導必須要超越時空，不淨只影響某一時代，而係時至今日對普世教會仲係有深遠影響，最後有晒呢啲證據之後就會由教宗以普世教會嘅益處去決定。
除咗今日紀念嘅聖十字若望之外，大家認識嘅教會聖師仲有：撰寫《神學大全》嘅聖多瑪斯．亞奎納、失物主保聖安多尼、同聖十字若望見過面，一齊改革修會嘅聖女大德蘭等等。