一年一度嘅聖週開始啦！今年澳門嘅教友已經可以實體參與，但香港嘅教友同去年一樣，仍然未有得返聖堂大大力揮住聖枝同埋大大聲唱「耶穌基督品位尊」！
．
雖然今年聖枝主日仍未能實體參與彌撒，但大家都要記住係愛德及克己上要繼續努力呀！
．
知道好多教友好心急究竟逾越節三日慶典可唔可以返聖堂參加公開禮儀，暫時仲有咁多不確定性嘅時候，唯有一心交託俾天主。
．
同埋都要為各個堂區嘅牧者及工作人員祈禱同打氣！如果要喺咁急嘅情況下開返聖堂，預計有好多新嘅防疫措施及規則要去處理。
．
我哋都想向教友們有一個呼籲，當有返公開禮儀嘅時候，對同為兄弟姊妹嘅工作人員都多一份同理心，保持愛德及準備好自己，「在恩寵的助佑下，跟隨基督，與基督一同背負十字架，以分享他的復活和生命。」
．