聖女伯爾納德係1844年1月7日出生，係6位弟兄姊妹中最年長嘅，自細體弱多病。爸爸本身係經營磨坊嘅麵粉商，可惜經營失敗，導致家道中落。佢出生嘅家庭雖然平凡，卻無阻聖母瑪利亞挑選佢作為自己嘅使者。
．
1858年2月11日至7月16日，聖母瑪利亞係露德一個山洞裡向伯爾納德連續顯現咗18次。當時嘅伯爾納德只係一個未初領聖體嘅14歲小女孩。
．
聖母瑪利亞係呢18次顯現入面帶出咗幾個重要訊息：
一、囑咐伯爾納德唸玫瑰經，為罪人祈禱
二、命伯爾納德挖出泉水，即係現今嘅露德聖水，治愈不少病人
三、命伯爾納德轉告當地神父，係山洞附近建聖堂
四、聖母是無玷始胎
．
作為聖母瑪利亞嘅使者，伯爾納德係傳佈訊息嘅時候不斷遇到譏笑同質疑，但即使困難重重，佢從來沒有質疑呢位顯現係佢面前嘅美麗女士——聖母，反而繼續純真地努力完成使命。
．
而家同大家分享下小編曾到訪過聖女伯爾納德嘅兒時故居相片。因為家貧，所以伯爾納德居住嘅地方非常簡陋，但伯爾納德父母冇只為糊口奔波而忘卻信仰培育，佢哋每晚會跟伯爾納德和其他仔女一同向天主祈禱同感恩。讓我哋都學習從神貧中感受天主嘅愛！
．
聖女伯爾納德，為我等祈！
．