聖喬治，看似同我哋生活冇咩交集，但你又估唔估到喺我哋日常生活最常接觸到關於聖喬治嘅東西？當然每人都有自己嘅答案，但熟悉歐洲足球嘅你又知唔知，英格蘭國旗正正就係一面聖喬治十字旗？我哋即刻帶大家一齊去認識下呢位聖人。
．
話說喺公元303年，羅馬皇帝逼害基督徒，聖喬治喺廣場上呼籲基督徒要堅守信仰，就咁就被當地總督抓捕處決。傳說聖喬治被捕之後受盡酷刑，但係都冇受傷，到行刑嗰陣時，天空仲因為聖人升天而變成金黃色。
．
聖喬治令人驚艷嘅仲有一個傳說（留意：係傳說，當故仔聽下就可以）：聖喬治屠龍
又話說喺利比亞嘅一個沼澤有一條毒龍，嗰度嘅居民每日都要貢兩隻羊俾條龍，後來貢到冇晒羊就要抽籤搵人嚟代替隻羊。有一日，國王個女兒抽中，咁當佢行緊落去個沼澤度準備俾條龍食嘅時候，聖喬治剛剛行到，於是乎就即刻攞起支長矛，一嘢插落條龍個口度，啲血流到一地都係，慢慢形成咗個血紅嘅十字。
．
故事就講完，不過傳說還傳說，聖人當日叫我哋要堅守信仰又確實係到今時今日都應該要做嘅事，希望今日少少嘅分享能夠堅固到大家對信仰嗰一份執著，仗賴上主嘅聖名繼續做上主所喜悅嘅事。
．