今日係聖雅各伯宗徒瞻禮，咁其實邊個係聖雅各伯宗徒？ 我哋要記得係十二位宗徒入面係有兩位雅各伯，今日呢位耶穌首先召為宗徒，所以傳統上叫佢做大雅各伯或長雅各伯（St. James the Greater）。 首先提供一啲資訊性嘅資料，大雅各伯係載伯德個仔，係聖若望宗徒嘅哥哥，係加里肋亞人，以捕魚為生。係聖經入面，我哋係好多地方都會見到有關大雅各伯出場，例如被耶穌召為宗徒、目睹耶穌復活雅依洛嘅女兒、耶穌係大博爾山顯聖容、山園祈禱等。最後聖人被黑落德殺害，而聖人係首位殉道嘅宗徒。
聖人曾去過西班牙傳教，死後安葬係西班牙聖地亞哥德孔波斯特拉（Santiago de Compostela）嘅主教座堂，時至今日有好多人都會去朝聖，仲會選擇行聖雅各伯之路（Camino de Santiago），一條由法國行到西班牙，全長接近800公里嘅路，咁當然大家都會按情況睇下行到幾多。 時常見到有關大雅各伯嘅標記有扇貝貝殼（Scallop Shells）、手持柺杖同埋福音書。貝殼嘅起因有唔同嘅講法，首先有講係從前啲人行聖雅各伯之路嘅時候，會用貝殼去放食物同埋水。而亦都有傳說係講聖人曾經拯救一個被貝殼包住嘅騎士，而另一個傳說係講聖人過身之後，有人將佢遺體由耶路撒冷運去聖地牙哥，途中一位騎士隻馬跌咗落海，就係呢個時候有個貝殼係海中保護住隻馬。 不過無論咩原因都好，聖大雅各伯宗徒都係我哋好值得去效法嘅聖人，大雅各伯同其他宗徒一樣都會有缺點，例如耶穌叫大雅各伯同若望兩個做「雷霆之子」，因為佢哋性別比較衝動急躁。但耶穌完全無介意佢哋嘅缺點，仲親自召為宗徒。就好似我哋一樣，耶穌無介意過我哋嘅缺點，亦都想我哋一生去追隨佢，但我哋係生活上會唔會有時會唔記得天主？將天主放埋咗一邊？由今日起要學習大雅各伯宗徒咁，願意飲主嘅杯爵，為天主努力去付出！ #聖雅各伯宗徒 #聖雅各伯 #聖雅各伯之路 #stjamesthegreater #stjames #wayofstjames #caminodesantiago #catholic #churchsupplies