Carlo Acutis係一位於2006去世嘅天主教青年，佢將會係今日喺意大利亞西西列為真福，今日同大家介紹佢下佢生平！
Carlo Acutis 係1991年於倫敦出世，之後同家人移居去米蘭。Carlo Acutis 熱愛聖體、熱愛聖母，佢會盡量參與彌撒勤領聖體、時常朝拜聖體、每星期辦告解。佢又會請求佢父母帶佢去聖人曾去嘅地方、曾出現聖體奧蹟嘅地方朝聖。 佢同一般青年一樣鐘意打機，而佢更曾運用嘅電腦程式嘅知識，整咗個宣揚聖體奧蹟嘅網站。佢曾話過：「當我哋愈領得多聖體，就會愈肖似耶穌，咁世界就愈有天國嘅預像。」 佢當時被確診患上白血病，當時佢將佢嘅痛苦獻俾天主、時任教宗本篤十六世及教會。佢係2006年去世，因佢深愛聖方濟各亞西西，所以按佢意願埋葬係亞西西。 我哋睇相見到真福嘅身體好完整，究竟佢嘅身體有冇腐化？最初話冇，但有人推翻咗，不過之後亞西西總主教Domenico Sorrentino喺彌撒入面話真福身體有經過正常人死後嘅腐化，但係佢注定要復活，現時Carlo Acutis嘅身體正安放係亞西西聖方濟各大殿內，而且仲係著住牛仔褲同埋NIKE波鞋！而佢嘅心臟會被奉為聖髑並存放喺大殿。
佢封聖嘅程序由2013年開始，佢係2018年被列為可敬者（Venerable）。宣福禮今日係聖方濟各大殿舉行，由聖座封聖部部長Angelo Becciu樞機主禮。 求天主讓我哋有真福Carlo Acutis嘅信德，時刻熱愛聖體，於現世中努力成聖、為主作證。